Diplomatie im Wandel der Zeit

L'idea per quest project è naschida gia avant la pandemia da COVID. Sco schef da la diplomazia svizra era jau numnadamain adumbatten a la tschertga d'ina istorgia illustrada davart la diplomazia svizra. Jau vuleva ma laschar inspirar, per definir da nov ils profils professiunals dals diplomats dal 21avel tschientaner. La recrutaziun da giuvens talents ma stat fitg a cor. Uschia essan nus vegnids sin l'idea da far ina seria da fotografias che preschenta il vast champ d'activitads da la diplomazia svizra – en il decurs dal temp!

La diplomazia è eterogena, ella n'ha betg lieu mo sin il tarpun cotschen, en conferenzas u a chaschun da retschaviments. La diplomazia ha lieu avant, durant e suenter las tractativas. La diplomazia etablescha relaziuns e collia; ella po evitar conflicts ed intermediar, nua ch'i na vegn betg pli discurrì. La diplomazia n'è mai statica.

Questa seria da fotografias è in'excursiun tras stgars 175 onns diplomazia svizra. En cas d'interess As envida ella da retschertgar pli detagliadamain. Forsa ch'ella serva in di sco inspiraziun per ina lavur da finiziun? Perquai che la gruppa en mira da «La diplomazia en il decurs dal temp» essas – ensemen cun ulteriuras gruppas interessadas – Vus, charas giuvenilas e chars giuvenils.

Jau ma legrel ordvart d'ussa pudair contemplar ensemen cun Vus las fotografias ch'èn vegnidas retschertgadas cun grond engaschi. A mias collavuraturas ed a mes collavuraturs èsi gartegià bain da tegnair en mira sur decennis tscherts aspects da la diplomazia e da preschentar uschia il svilup ed il progress cuntanschì.

Jau na vi betg As privar d'ina ulteriura infurmaziun: La seria da fotografias che jau As preschent oz, duai cuntinuadamain vegnir extendida ed il project amplifitgà. «La diplomazia en il decurs dal temp» porscha in intent d'utilisaziun dinamic. I cunvegn pia er en l'avegnir da returnar a questa pagina dal DFAE. La chapientscha per noss passà è numnadamain quai che furma noss avegnir.

Jau As giavisch invistas interessantas ed inspirantas!

Ignazio Cassis
Cusseglier federal

La diplomazia en il decurs dal temp